TACLOBAN CITY – Malipayon an mga kabataan ha norte nga parte han syudad nga upod hira ha nagpapadayon nga National ID registration program nga proyekto han national government ipinaagi han Philippine Statistics Authority (PSA) ngan han City Government of Tacloban.

An mao nga registration center in nahimumutang ha Tacloban North City Hall Extension Office ha Brgy. 106 Sto. Niño nga gin-establisar ni Mayor Alfred S. Romualdez agud maserbisyuhan an mga taga Norte Tacloban kun diin nahimumutang an mga Yolanda survivors nga diri na madurohan han gastos pasahe ngan panahon ha pagkakadto ha sentro han siyudad.

Sumala kan Paul T. Opiniano, Supervisor han ID Registration,  ha luyo han kadamo han napa rehestro, ira ginsisiguro nga nasusunod an mga Health Protocols, sugad han pagsul-ot han face mask, face shield, ngan physical distancing.

-- Advertising --

Mababaruan nga nagtikang han nakalabay nga Hunyo 15 an panrehistro han National ID para ha mga kabataan nganag eedad hin 15 -anyos paigbaw, samtang hine la nga bulan han Hulyo gintikangan liwat an panrehistro han mga kabataan nga nag-eedad hin 5-anyos  paigbaw.

Ginkikinahanglan la nga igpakita han mga maparehistro nga kabataan an ira Live Birth ngan valid ID.

Ginmalatumat naman han mao nga opisyal nga maaboy ha 175 nga indibidwal an ira narerehistro kada-adlaw, tinikangan ha Lunes  hangtod ha adlaw hiton  Biyernes.

Mababaruan nga naghuman na ngada han nakalabay nga Sabado ngan Domingo an ira panrehsitro ha Norte nga parte han syudad, ngan hapagkyana in nagpapadayon naman an ira panrehistro ha Astrodome area syudad han Tacloban.