TACLOBAN CITY – Samaran an usa nga pulis mahuman ini nga pagbun-on han usa nga hubog ha Brgy Casilda, Merida, Leyte

Photo Source: wwaytv3.com

Ginkilala an mao nga pulis nga hi  PCpl Lope Cueva, 32 anyos, ngan nakadestino ha Merida PNP Station samtang an suspek in ginkilala nga hi Benjie Lumbab, 25 anyos, ngan residente han Brgy Nadunghulan, Ormoc City.

Sumala kan PCapt Ian Salvador Po, hepe Merida MPS, nga samtang nagmamaneho han iya motorsiklo hi Cueva in ginkatapo hini an suspek nga nagpipinasaway ha dalan.

-- Advertising --

Ginda-op han pulis hi Lumbab basi pagsawayon ngan sagdunan, pero tigda bumunlot hin  pisaw an suspetsado.

Gin-ikaburuno ha tiyan an pulis, pero iya ini nasagang ngan nasamad hiya ha braso.

Dayun naman nga  umiskapo an suspek mahuman an panmuno.

Samtang nakuha ha crime scene an  14-pulgadas nga pisaw nga gingamit han pagbuno.

Nagpapatambal naman yana ha Ormoc District Hospital an biktima ngan padayun nga nagpapatambal.

Ginpasakahan naman hin kaso nga frustrated homicide an mao nga suspek.