TACLOBAN CITY – Ginpahayag han Simbahang Katoliko nga gintutugot yana nga maabot nga Palm Sunday an panbendita han lukay kasumpay han pagsalin-urog han Semana Santa yana nga tuig.

photo: Philippine News Agency; Ginpahayag han Simbahang Katoliko nga gintutugot yana nga maabot nga Palm Sunday an panbendita han lukay kasumpay han pagsalin-urog han Semana Santa yana nga tuig.

Sumala kan Fr. Chris Arthur Militante, han Archidiocese han Palo, kun han una nga tuig in pinaagi la ha livestreaming ha social media platform an mga aktibidad han Palm Sunday ngan naglibot la an mga kapadian ha mga barangay, yana nga tuig in gintutugot na ha mga katawhan nga tumambong han misa ha mismo singbahan.

Pwede na gihapon nga magdara hin lukay an mga deboto ha Singbahan para pabenditahan an mga ini pero mayda pagbabag-o nga igpapatuman.

-- Advertising --

Kumpara han mga naglabay nga tuig nga tradisyon ha kada Palm Sunday kun diin nagkakatitirok pa an mga katawhan ha gawas han simbahan ngan nagkakaada hin prosesyon, yana nga maabot nga Dominggo han Palaspas, in kinahanglan nga nakapwesto na nga daan an mga maniringba ha mga lingkuran han simbahan ngan an padi nala an malusad pagbendita ha mga ini.

Nanawagan naman an Simbahang Katoliko ha mga maniringba nga magsunod ha mga ginpapatuman nga aludayday labi na gud an mga health protocols agud nga magkaada hin mahinungdanon nga pagtigaman han Semana Santa ngan masiguro nga dire ini magiging kawsa han paghitaas han kaso han COVID-19.