TACLOBAN CITY – Ginpahayag han Leyte Provincial Health Office nga an paghitaas han COVID-19 cases ha probinsya han Leyte in epekto han naglabay nga holiday break.

photo ctto; Ginpahayag han Leyte Provincial Health Office nga an paghitaas han COVID-19 cases ha probinsya han Leyte in epekto han naglabay nga holiday break.

Sumala kan Dr. Lesmes Lumen, Leyte Provincial Health Officer, subay ha ira monitoring nakit-an nira nga kasagaran han mga panibag-o nga mga kaso han COVID-19 ha probinsya in mga close contacts.

Nagawas gihapon nga may usa o duha nga mga COVID-19 positive nga damo an natapnan nga mga pasyente.Dugang pa hini nga ginlalaluman na nira an mao nga panhitabo tungod nga han naglabay nga holiday season in damo nga mga katawhan an waray magpapugong ngan waray magsunod ha gindidire nga mga dagko nga mga katitirok ngan parties.

-- Advertising --

Nahibaruan nga umabot ha 93 an ihap han panibag-o nga mga kaso nga naidugang ha probinsya han Leyte.

Tungod hini in punuan na an mga quarantine facilities ha pira nga bungto sugad han Abuyog ngan Merida sanglit ginpili han mga ini nga igbalhin ha mga pasilidad ha Leyte Academic Center (LAC) Gym an ira pasyente.

Nahibaruan nga an LAC quarantine facility ha Palo, in akos nga mag-akomodar hin maabot 105 nga mga pasyente.