TACLOBAN CITY – Naging mahugot an pagbabantay han mga kapulisan ha usa nga vaccination hub ha Tacloban partikular na ha Leyte Normal University (LNU) mahuman ini nga pagdumugon hin damo nga mga katawhan nga karuyag magpabakuna kontra COVID-19.

Sumala kan Pol.  Maj. Allan Camasin, tagapagyakan han Tacloban City Police Office, nagkaada hira dayon hin augmentation han ira mga personnel ha mao nga vaccination hub agud nga mapabilin an seguridad ngan masunod an mga health protocols kontra COVID-19.

Tungod manggud han kadamo han tawo in waray kasunod an physical distancing ngan pira pa nga mga health protocols.

-- Advertising --

Damo gihapon an mga walk in clients nga pumakadto para magpabakuna bisan kun dire pa nira schedule o dire pa hira upod ha prayoridad nga mga barangay nga mababakunahan yana nga adlaw.

Nanawagan naman ini ha publiko nga dire makigdurungan ha nakaschedule nga priority group ha pagbakuna agud nga malikayan an pagbugiot ngan dire maging kawsa han pagsarang han virus.