TACLOBAN CITY – Maabot hin 8,710 nga mga pulis ngan kasundaluhan an igdeploy ha bug-os nga Eastern Visayas para siguruhon nga magigin mahimyang an pagdudumaraon nga May 13 midterm elections.

Ha send-off ceremony kakulop nga adlaw ha Philippine National Police (PNP) regional headquarters ginmando ni PBGEN Ariel Arcinas, an Deputy Regional Director for Administration ha mga law enforcers nga buhaton an tanan para masiguro nga magigin malimpyo, mahimyang ngan malinampuson an maabot nga piniliay.

Ha 8,710 nga personnel nga igdedeploy, 5,332 iton magtitikang ha PNP ngan 2,878 naman iton tikang ha Philippine Army .

-- Advertising --

Hira iton magsesecure han 3,773 nga mga voting centers ha bug-os nga Eastern Visayas ngan maduty kutob Mayo 16.

Magtitikang an 5, 332 nga mga kapulisan ha PRO-8 regional headquarters, regional mobile force battalions, regional service unit, ngan regional training center.

Hini nga ihap 2,276 an ig-aassign ha Leyte, 852 ha Southern Leyte, 195 ha Biliran, 866 ha Samar, 728 ha Eastern Samar, 579 ha Northern Samar, 166 ha Ormoc City ngan 176 ha Tacloban City.

Ginpahayag pa ni PBGEN Ariel Arcinas nga diri la an voting centers an poproteksyunan han mga kapulisan kundi upod na an katalwasan han mga botante ngan mga kandidato.

“Primarily, their task is to secure not just the voting center, but the voters and candidates as well. If we can secure them, there will be peace and order and successfully conduct the elections,” pahayag ni Brig. Gen. Ariel Arcinas, PRO-8 deputy director.

Samtang, ha 2,878 nga mga kasudaluhan nga igdedeploy, 300 an maa-assign ha Leyte, 86 ha Southern Leyte, 49 ha Biliran, 1069 ha Samar, 406 ha Eastern Samar, 930 ha Northern Samar, 28 ha Ormoc City ngan 10 dinhe ha Tacloban.

Sumala kan 8th Infantry Division Assistant Chief Brig. Gen. Eleazer Lozañes diri madali an pagbantay ha eleksyon ha rehiyon tungod ha presensiya han mga rebelde, private armed groups ngan mahugot nga political rivalries ha pipira nga mga lugar.

“The task that lies ahead is not easy for Region 8 for it has long been blemished with election hotspots due to the proliferation of guns, goons, and gold nurtured by some politicians. It is more difficult given that the New People’s Army terrorists are expected to make their presence as we approach Election Day,” pahayag ni Brig. Gen Lozañes ha augmentation forces.

Pero ginpatapod hini nga committed an buhatan han Philippine Army para buligan an Comelec ngan mga kapulisan nga magin malinampuson an 2019 midterm elections.

Mababaruan nga mayda 11 nga mga munisipyo ha Samar ngan Northern Samar an iginpailarom han Comelec ha red category o kon areas of grave concern tungod han mahugot nga political rivalries ngan hulga han mga armado nga grupo.