TACLOBAN CITY – Damo nga mga anggulo an ginhihingita han mga otoridad bahin han nahitabo nga panmumusil ha usa nga pulis ha Brgy. Buri, Palo Leyte kakulop nga adlaw.

Sumala kan PCI Jomen Collado, hepe han Palo PNP, nga ha pagkayana in nagpapadayon an ira gindudumara nga imbestigasyon bahin han mao nga panhitabo.

Ginreview na gihapon nira an CCTV camera footage kun diin mayda na nira nga ginsususpetsaran nga mga sarakyan nga posible nga ginamit han mga suspek.

-- Advertising --

Ginhihingita naman nga anggulo han mga otoridad nga posible nga personal, may kalabutan ha trabaho ngan pagkakaassign hini kumo dati nga chief han City Drug Enforcement Unit ha Ormoc.

Samtang, padayon naman an ginbubuhat nga pagbabantay han mga kapulisan ha pamilya han biktima nga hi PSI Jovel Young nga nagpapabilin pa ha ospital.

Sumala kan PCI Jomen Collado, hepe han Palo PNP, nga ha pagkayana in ada ha stable nga kabutangan hi PSI Jovel Young, 38 anyos an pangidaron, presente nga naka-assign ha RHSG Police Regional Office 8 (PRO 8).

Naging malinampuson naman an operasyon hini kun diin siyam nga mga bala an nakit-an ha lawas hini mahuman nga pauranan hin maabot 36 nga bala han mga waray pa kakikilal-i nga suspek.

 

Ha pagkayana in ginhuhulat pa nga maupay an mao nga biktima agud nga mapakianhan ngan makabulig ha gindudumara nga imbestigasyon bahin han mao nga insidente.