ODD NEWS- Usa nga eroplano han usa nga Nepal-based airline an nawara ngan naglanding ha iba nga lugar nga maabot ha 400 kilometro an kahirayo tikang ha orihinal nga destinasyon hine.

PHOTO SOURCE: OUTLOOK INDIA

Bagaman nga waray emergency, naglanding tigda ha siyudad han Pokhara an December 18 flight han Buddha Air nga lumupad tikang ha Tribhuvan International Airport.

Pakadto kunta an mao nga eroplano ha siyudad han Janakpur nga 402 km pa an kahirayo tikang ha ginlandingan.

-- Advertising --

Sumala ha tagapagyakan han Buddha Air, matungod daw han kakulangan ha komunikasyon ngan dire pagsunod ha standard operation procedure an naging hinungdan han kalipat han eroplano.

Gintagan naman hin espesyal nga permiso an eroplano para makalupad tikang ha Pokhara pakadto ha Janakpur sanglit talwas nga nakaabot ha ira destinasyon an 69 nga mga pasaheros.

Bumug-os na hin usa nga komitiba para imbestigaran an hinungdan han kawara han eroplano.