TACLOBAN CITY – Iginkakalipay han mga parag uma hin lubi ha Sinirangan Bisayas nga abre la gihapon an purtahan para maipasar an Coco Levy Fund bill.

Ini ha luyo nga gin-veto an natura nga balaudnon ni Presidente Duterte tungod nga pupwede daw ini magin tinikangan hin korapsyon.

Ha ginbuhat nga political rally kakulop nga adlaw kon diin tumambong Senator Cynthia Villar, ginpatapod hini nga igduduso la gihapon nira an Coco levy bill.

-- Advertising --

Sumala kan Villar, kumo Chairman han Committee on Agriculture and Food igrereview nira an natura nga balaudnon para mahisabtan an rason kon kay anu gin dis abuyunan ini han Presidente.

Kon papalaron an senadora ha maabot nga midterm elections, igpa-file daw ini niya dayon pag abot hiton bulan han Hulyo.

Sumala kan Alfredo Catindoy, usa nga parag uma hin lubi dako iton maibubulig ha ira kon diri mapapabay an natura nga balaudnon tungod nga nakihanglan manggud hira hin ayuda ilabi na nga apektado hira ha paghibubo ha presyo han lugit.

Subay ha datos han Philippine Coconut Authority aada ha 13 pesos an average farm gate price hiton lugit ha Sinirangan Bisayas.