TACLOBAN CITY — Usa nga 40- anyos nga bumbero an namatay ha gindumara nga buybust operations ha Barangay Rizal, Sogod, Southern Leyte dida han Miyerkules, Mayo 19, alas 11:20 han aga.

Sumala kan Police Lieutenant Maja Beringuel, team leader han Provincial Drug Enforcement Unit han Southern Leyte, iton suspek in ginkilala kan Jody Daclan Magallanes, usa nga myembro han Bureau of Fire Protection (BFP) nga naka-assign ha Mahaplag Fire Station ha Leyte ngan residente han Barangay Mahayahay, Sogod, Southern Leyte.

Nagawas ha report nga nakapalit an pulis nga nagpakilala nga poseur buyer hin ginbabana bana P70,000 nga kantidad hin gin aalegar nga shabu tikang ha suspek.

-- Advertising --

Han makasabot daw an suspek nga pulis an iya katransakyon in iya ini ginpabuthan han iya dara nga kalibre 45 nga pusil.

Ginyaknan daw han mga operatiba an suspek nga sumurender nala pero padayon hini nga ginpauranan hin bala an mga pulis.

Waray nahimo an mga pulis kundi makigbalyuay hin buto ha suspek kon diin naigo ini ha iba iba nga parte han iya lawas.

Waray naman nasamaran o namatay ha panig han mga otoridad.

Mahuman an operasyon in gindara dayon an suspek ha Sogod District Hospital para matagan hin kaangayan nga atensyon medikal pero gin-anunsyo ini nga dead on arrival (DOA) banda alas 12:10 p.m. han umatendir hini nga doktor.

An buybust operations in gindumara han Provincial Drug Enforcement Unit han Southern Leyte, PDEA Southern Leyte, Sogod Police Station kaupod an Southern Leyte Police Mobile Force Company.