VEHICULAR ACCIDENT: Bumaliskad nga van han nahitabo nga aksidente ha Bgy. Dale, San Roque, Northern Samar. Nabangga hini an usa nga motor nga may pito katawo nga sakay ngan may karga pa nga mga pakwan. 11 an nahipatik nga samaran ha nahitabo nga insidente kaupod na an sakay han van. Gindara naman dayon ha hospital an mga biktima.
PHOTO COURTESY: NORSAM.NET FB PAGE


TACLOBAN CITY – Nagbilin hin 11 nga samaran an nahitabo nga bungguay han usa nga van ngan motorsiklo ha bungto han San Roque Northern Samar.

Sumala ha mga otoridad nahitabo an insidente banda alas 8:15 han kulop dida han Huwebes, Mayo 16 ha national highway ha Barangay Dale ha nasabi nga munisipyo.

Subay ha report tikang San Roque Municipal Police Station, an insidente in ginkadabihan hin usa Nissan kon diin may upat ini nga sakay ngan XRM Honda motorcycle nga may angkas nga pito katawo.

-- Advertising --

An drayber han Nissan in ginkilala kan Gino Siervo, 49 anyos, residente han Barangay Coroconog, San Roque Northern Samar.

Hi Niervo in gin-aalegar nga nakainom ngan waray naipakita nga driver’s license ha mga otoridad.

An iya mga sakay in ginkilala kanda Ruve Jazmin, 19 anyos, estudyante; Manuel Jazmin, 11 anyos an pangidaron ngan Melvin Robiano, 28 anyos.

An motorsiklo naman in ginmamaneho ni Rudy Mejos, 42, residente gihapon han Barangay Dale.

Sakay niya hira Ariel Perez, 23 anyos ; Reniel Adane, 14 anyos; Renel Adane, 16 anyos; Elias Adane, 21 anyos; Eduardo Morillo, 16 anyos; ngan Jayson Castillo, 18 anyos an pangiradon.

Nagawas ha inisyal nga imbestigasyon han mga kapulisan nga ginbabaybay han pareho nga behikulo an dalan tipakadto ha proper han San Roque kon diin nasagi han drayber hiton Nissan an karga nga pakwan han motorsiklo.

Nawarayan hin kontrol han manibela an pareho nga drayber nga nagin rason han pagbaliskad heton ira sarakyan.

Nag angkon hin samad ha iba iba nga parte ha lawas an mga sakay hini nga gindara liwat ha Northern Samar Provincial Hospital, ngan San Roque Rural Heath Unit para hin kaangayan nga atensyon medikal.

Padayon naman an imbestigasyon han mga otoridad kabahin han insidente.