ROXAS CITY – Nagahatag sang kakugmat sa pila ka mga residente sa Taiwan ang nagapadayon nga tensyon batuk sa pungsod sang China.

Ini ang ginpahayag ni Bombo International Correspondent Dr. Reynand Fenolan Dumala-on, tumandok sang Capiz, kag isa na ka tuig nga manunudlo sa isa ka American School sa Hsinchu County, Taiwan, sang exclusive nga mainterview sang Bombo Radyo.

Suno diri, nga normal ang sitwasyon sa ila lugar, apang mabatyagan ang tensyon bangud sa pagpahamtang sang mga jet fighters sang China sa kahawaan nga sakup sang Taiwan.

Makabig suno diri nga “pagpang garit-garit” sa gobyerno sang Taiwan ang ginahimo nga paglibot sa kahawaan sang kapin 50 ka mga jet fighters sang China, nga kabahin sang ila ginapatigayon nga exercises.

Suno diri, temprano pa nga mag-conclude nga may giyera, apang bangud sa tensyon sa karon, 60 porsyento ang posibilidad nga may mahinabo nga kinagamo sa lugar.

-- ADVERTISEMENT --

Dugang pa sini, suno sa nangin pahayag ni Taiwan President Tsai Ing-wen, luyag sini nga mag-ugyon ang pumuluyo, kag ginsiling nga indi mag-umpisa ang Taiwan sang giyera, apang ginpasiguro nga ila paga-depensahan ang ila teritoryo batuk sa China.

Nagapati man ini nga manggaranon nga pungsod ang Taiwan, apang pag-abot sa giyera, kinahanglanon sini ang puwersa sang iban nga pungsod.

Nahibaluan nga ginapanindugan sang China nga ila teritoryo ang Taiwan, apang hugot naman nga nagapakigbato ang Taiwan, nga independent sila sa China.