Magatukod sang special investigation task group ang kapulisan nga magatutuk sa imbestigasyon sa pagluthang-patay kay anay Pilar Municipal administrator John  Heredia.

Ginpahayag ni Police Master Sergeant Ramil Arcangeles, information officer sang Roxas City Police Station nga pangunahan ang nasambit nga task group sang Provincial director sang Capiz Police Provincial Office (CPPO).

-- Advertising --

Katuyuan sang pagtukod sang nasambit nga task force nga matutukan ang krimen kag mahatagan hustisya ang kamatayon sang biktima nga isa ka anay media practitioner antes nangin municipal administrator.

Suno kay Arcangeles nga daku ang posibilidad nga may nakakita sa krimen bangud sa amo nga mga inoras, madamo sang tawo sa lugar sa diin may pila ka mga tricycle nga naga-park kag nagahulat sang kostumer gikan sa hardware nga wala sang salakyan, magluwas pa sa mga empleyado.

Narekober sa ginluntaran sang krimen ang pito ka mga fired cartridges, 2 ka deformed bullet kag isa ka metal fragment nga ipaidalum sa ballistic examination.

Indi pa matumod ang motibo sa krimen bangud nagapadayon pa ang maidid nga imbestigasyon sa karon.

Ginatan-aw man karon ang tanan nga anggulo samtang nagakuha pa sang dugang nga impormasyon ang kapulisan agud matumod ang identity sang mga suspek kag ang ila motibo sa pagpatay sa biktima.

Bisan paano nakabulig ang CCTV footage sa imbestigasyon sa diin nakita nga nagasuksok sang hood kag jacket nga nagaduag sang dirty white kag gray, asul nga pantalon ang mga suspek kag naka-rubber shoes ang triggerman samtang naka-tsinelas ang driver sang motorsiklo.

Samtang nagapanawagan si Arcangeles sa publiko kun sin-o ang nakasaksi ukon nakakita ukon may nahibaluan sa krimen, mahimo makig-angut lamang sa pulisya kag ginpasiguro sini ang confidentiality sang identity kag pangalan sang witness para sa iya seguridad.

Matandaan nga ginluthang-patay si Heredia sa isa ka hardware sa Barangay Lawaan, Roxas City kahapon sang hapon sang riding-in tandem sa diin nag-angkon sang patal nga pilas sa ulo, liog, likod kag lawas ang biktima nga gintunaan sang iya nga kamatayon.