Personal nga nagbisita ang Regional Director sang Bureau of Fire Protection 6 sa hamyang sang anay municipal fire marshall sa banwa sang Dao kahapon.

Ginpahayag ni Chief Inspector Melanie Habawel, Acting Provincial Fire Director sang Capiz nga nagpakigkita si Sr. Supt. Jerry Candido sa pamilya ni SFO4 Ronnel Contreras kag personal nga ginpalab-ot ang iya nga pagpakig-unong.

-- Advertising --

Wala nagdugay ang opisyal bangud matapos ang iya pagbisita sa hamyang ni Contreras nagpaniaga sila sa makadali kag nagbalik na ini sa Iloilo.

Suno kay Habawel nagtal-us sa pwesto sang nagtaliwan nga si Contreras si SFO2 Leopoldo Adrid Jr.

Ginkumpirma man sang opisyal ang pagpaidalum sa lockdown sang duha ka mga fire station sa segundo distrito sang probinsiya sang Capiz nga ginalakipan sang Sigma kag Dao Fire Station matapos may empleyado ang amo nga talatapan nga nagpositibo sa COVID-19.

Bangud lockdown ang duha ka mga fire station, temporaryo nga suspendido ang tanan nga mga transaksyon sa talatapan.

Apang pananglitan may magluntad nga sunog, obligado ang mga personnel nga magresponde.

May ginapatigayon nga COVID-19 response ang talatapan, sa ila personnel nga magbatyag sang flu like symptoms, sa diin ila ginapanugyanan nga indi na magduty kag magtenir na lamang sa ila balay.

Samtang ginkumpirma ni Habawel nga may pito ka mga fire station sa probinsiya sang Capiz nga ginapaidalum sa konstruksyon kag repair.

Kalakip diri ang Panay, Pilar, President Roxas kag Cuartero kag ginpaidalum sa repair ang fire station sang Tapaz, Maayon kag Roxas City.

May yara man sang 24 ka mga fire truck sa magkatuhay nga mga fire stations sa probinsiya sang Capiz.