Tatlo lamang ka semana nagdugay ang quarry operation sa Barangay Dacuton, Dumarao kag ini ang gin-untat kasunod sang kontrobersiyal nga pagpa-untat sa LGU Sigma sang CAPENRO bangud sa kapaslawan nga makakuha sang permit sa gobyerno probinsiyal.

Ginpahayag ni Mayor Edgardo Arancillo sang Dumarao nga gilayon gin-untat ang nasambit nga operasyon matapos nabatian nga dapat may permit gikan sa gobyerno kun magpatigayon sang quarry operation apisar nga sa nasambit man nga lugar gamiton ang mahakot nga mga lapok ukon buga.

-- Advertising --

Aminado si Mayor Edgardo Arancillo sang Dumarao nga nagpatigayon sang quarry operation sa Barangay Dacuton kag ang lapok nga nahakot ang gingamit sa pagtambak sa lubakon kag gubaon nga dalan sa nasambit man nga barangay.

Ginpasiguro man sang alkalde nga ang makuha nga lapok sa Barangay Dacuton ang wala ginapaguwa sa iban nga banwa.

Nahibaluan gikan kay Arancillo nga may yara sang kaugalingon nga heavy equipment ang LGU sang Dumarao apang bangud sa ila pag-abyanay sang alkalde sang Mambusao nakahulam ini sang equipment para sa paghakot sang lapok.

Nagapati man ang opisyal nga pananglitan nga nagdiretso sa ila banwa ang task force matapos ang ila nangin operasyon sa banwa sang Sigma, sigurado nga nadakpan man sila.

Samtang nagpasalig man ang alkalde nga indi na pagsuliton ang quarry operation kun indi makakuha sang permit sa gobyerno agud indi sila makalapas sa laye.

Sa karon ginahikutar nila ang nagakaigo nga papeles nga ila igasumiter sa gobyerno probinsiyal agud makapatigayon sila sang legal nga quarry operation.