Suportado sang iya pamilya ang pagsulod sa pulitika ni retired Provicial Engineer Officer Edgar Agana.

Ini ang ginkumpirma ni Engr. Agana kasunod sa pagretiro sini subong nga adlaw sa gobyerno probinsiyal.

-- Advertising --

Ginpahayag sini nga sa 29 ka tuig nga serbisyo sa gobyerno madamo ini sang natun-an kag ginpangatubang nga mga pagtilaw sa iya trabaho.

Isa sa mga nagtulod kay Agana para magsulod sa pulitika agud mapadayon ang pagpanerbisyo sa mga Capizeño nga luyag sini mabuligan.

Positibo man ini nga dayunon ang plano bangud nakita sini sa iya nga paglibot libot sa kabaranggayan ang mainit nga pagbaton sa iya sang mga pumuluyo.

Ginpanindugan sini nga indi siya magpadulong sa mga kabaranggayan kag kabanwahanan kun wala sini nakita kag nabatyagan ang suporta sang mga pumuluyo.

Ginpanindugan man sini nga maayo ang ila relasyon sang pamilya Contreras kag wala sang makaguba sa ila maayo nga pagtamdanay sang pamilya sang gobernador.

Nahibaluan nga nagsugod si Agana sa iya pagserbisyo sa probinsiya sang Agosto tuig 1992 sa DPWH sa idalum sang administrasyon ni anay Capiz Governor Esteban Contreras kag matapos ang 29 ka tuig nagretiro ini sa idalum sang administrasyon ni Governor Esteban Evan Contreras II.

Ginpabugal sini ang madamo nga proyekto nga gindumalahan sa probinsiya nga nagserbe sini nga legasiya sa iya pagretiro sa serbisyo.

Kalakip diri ang Capiz Business Center, SOCO building kag pagpasemento sa mga dalanon.

Aminado si Agana nga madamo man sang pagpanghangkat sa iya pagserbe bilang provincial engineer officer, apang nalampuwasan niya ini tanan.

Suno diri nga nagretiro siya nga klaro sa anuman nga financial responsibilities sa probinsiya.

Samtang wala ini naghatag sang rekomendasyon sa gobernador kun sin-o ang magatal-us sa iya sa pwesto, bangud indi sini luyag pangunahan si Governor Contreras.

Apang ginpasiguro sini nga kwalipikado ang nabilin nga mga inhenyero para sa amo nga pwesto.