ROXAS CITY – Nagaserbi nga preparasyon sa posible nga pagtaas liwat sa kaso sang Coronavirus Disease 2019 (COVID-19) ang rason kun ngaa ginbakal sang lokal nga gobyerno sang Roxas City ang COVID-19 Anti-Viral Pill nga Molnupiravir.

Ini ang ginpahayag ni Mr. Ronald Amigo, ang Assistant Department Head sang Roxas City Government sang mainterview sang Bombo Radyo Roxas.

Suno kay Amigo, personal nga nagpadulong sa Metro Manila si City Mayor Ronnie Dadivas agud mahikot ang permit nagikan sa Food and Drug Administration (FDA).

Kasunod sini, gilayon si Dadivas nga nagdiretso sa suppliers agud maka-purchase sang nasambit nga bulong.

Suno kay Amigo, tinutuyo pa sang Anti-Viral Pill nga Molnupiravir amu nga ma-preparahan man ang pamahog sang Omicron variant nga posible makasulod kag makalaton sa mga pumuluyo sang syudad kag probinsya.

-- ADVERTISEMENT --

Ginpaangid man ni Amigo ang Molnupiravir sa Tocilizumab nga amu ang pinakamahal nga bulong para sa COVID-19 apang nagaguwa nga epektibo sandig man sa pagtuon sang mga drug companies.

Ginpahayag pa sini nga on-going na sa karon ang pagbakal sang lokal nga gobyerno sang syudad sang indi magnubo 10,000 ka mga capsules sang Molnupiravir ilabi na kag yara sa gihapon sa emergency situation ang Roxas City.

Pananglitan nga makabakal na, igapahamtang ini sa Hortus Botanicos sa Barangay Milibili, Roxas City agud ma-administer sang mga doktor sa pasyente kun ini na ang kinahanglanon nga gamiton.

Ginalantaw nga mahimo magamit sang isa ka pasyente ang isa ka bote kun sa diin nagaunod ini sang 40 capsules.

Ginalauman naman nga ma-transport na sang supplier ang ginbakal nga bulong sang syudad sa madali nga panahon apisar wala pa nabayaran.

Sa karon, wala pa ini sang ideya kun mangin libre ang paghatag sang bulong sa mga indibidwal nga maga-positibo sa COVID-19.

Nagapasalamat man ini sa maayo nga sitwasyon sa karon sang syudad may kaangtanan sa mga aktibo nga kaso sang nasambit nga balatian.

Samtang, nagpanawagan naman ini sa mga pumuluyo nga wala pa mabakunahan sang COVID-19 vaccine tubtob sa karon nga magpabakuna na.