ROXAS CITY – Ginpasalig sang transport group nga Pinagkaisang Samahan ng mga Tsuper at Operator Nationwide (PISTON) – Capiz nga indi sila luyag nga may pagtaas sa pagsuloktan sang pamasahe apisar nga asud-asod ang pagsaka sa presyohanay sang produktong petrolyo.

Ini ang ginpahayag ni Mr. Jobert Carandang, ang presidente sang PISTON-Capiz sang mainterview sang Bombo Radyo.

Suno diri, nga naintindihan sang ila sektor ang sitwasyon sang mga commuters kun dugangan pa ang pamasahe sa mga pampubliko nga salakyan.

Ginpahayag sini nga ang ila luyag ipalab-ot sa gobyerno amu ang kontrolon ang presyo sang produktong petrolyo, hatagan sang subsidiya ang mga public utility drivers, kaangay suno diri sang pantawid pasada nga programa sang nagligad nga tuig, kag ibasura ang deregulation law ukon ang RA 8479 nga suno diri, perwisyo sa mga pampubliko nga tsuper.

Indi man sini luyag nga mag-abot sa punto nga magapatigayon sila sang pag-untat sa biyahe kun magpadayon pa ang pagtinaas sa presyo sang gatong sa bug-os nga pungsod.

-- ADVERTISEMENT --

Naluoy lang ini maglantaw sa pampubliko nga driver nga haluson sakto lang ang ginakita sa pamasahero sa ila gasto sa gatong.