ROXAS CITY – Dismayado ang alkalde sang syudad sa tagdumalahan sang MV Starlite Saturn nga nagdungka kahapon sa Culasi port sa diin may ginpasakay nga mga Locally Stranded Individuals (LSIs).

Suno kay Mayor Ronnie Dadivas nga klaro sa ila pag-estoryahanay sang mga representante sang mga shipping companies nga cargo truck lamang nga nagakarga sang pagkaon ukon mga essential things ang mahimo nila nga makarga padulong sa Roxas City kag indi mahimo nga magpasakay sang mga LSIs.

Ginpahayag sang opisyal nga ginlapas sang management sang Starlite Saturn ang local policy kag wala man sang koordinasyon ukon nakahatag sang abiso sa mga LGU’s, CDRRMO, City Health Office nga amo ang magasugat sa mga LSIs nga nagapauli.

Delikado ang ginhimo sang amo nga barko bangud ginbutang sini sa peligro ang kabuhi sang mga pumuluyo.

Bangud may ginlapas nga pagsulundan ang amo nga barko, temporaryo nga pauntaton ang operasyon sini.

-- Advertisement --