Nagtipon ang mga investors/downlines sang RGS World Marketing Corporation sa barangay hall sang Barangay Libas sining syudad agud i-reklamo ang napalso nga promesa kag pay-out sang ila team leader.

Ginpahayag ni Manang Neneng, fish vendor nga ginbubo nila kaupod ang iya pamilya ang ila hard earned money sa RGS Triple your money sa paglaum nga triple man ang mabalik sa ila nga investment.

-- Advertising --

Suno diri nga daku ang ila pagsalig kay Anabelle Limpoco nga isa ka manunudlo gani wala sang pagpangduha duha nga nag-invest sila sa triple your money, apang nadismaya bangud wala sila nakapay-out kabaliktaran sa ginpromesa sa ila.

Nagpangabay man ang ginang nga magpakita sa ila si Limpoco kag atubangon ang nangin kapalpakan sini.

Ginpanindugan man sini nga may ginauyatan sila nga mga papeles nga magapamatood nga naghatag sila sang investment diri.

Samtang dismayado naman si Manang Julie matapos nga kasubong nadula ang ila investment nga naglab-ot sa P350,000.

Suno sa ginang nga ila gintingub nga magpamilya ang nasambit nga kantidad kag pareho sa iban ginpromesahan man sila apang pag-abot sang adlaw nga maga-pay out na sila, ginhambalan siya nga madamo pa ang nauna nga magapay-out sa iya.

Desidido man nga maghimo sang legal nga tikang ang mga investors, pananglitan nga wala na gid sang tsansa nga mabalik bisan kapital na gid lamang nila.

Samtang suno naman kay Kapitan Richard Arrojado nga makapila na sini ka beses nga ginpa-summon si Limpoco, apang wala nagapakita ang nasambit nga team leader.

Bangud sa nagadamo na nga nagareklamo nga investors sang triple your money sa ila barangay plano sang punong barangay nga magkuha sang abogado para mabuligan ang mga investors.