Makabig nga hands on sa mga ginapatuman nga proyekto ang alkalde sang syudad.

Ginpahayag ni Heloise Mendoza, market administrator sang Teodoro Arcenas Trade Center (TATC) nga makita ang presensiya ni Mayor Ronnie Dadivas sa on-going construction sa riverside area sang merkado publiko, bangud luyag sini mahibaluan kun diin na kutob ang proyekto kag kun nagansantu sa plano ang trabaho.

-- Advertising --

Suno kay Mendoza nga luyag sang alkalde sa pagsugod sang proyekto dapat tayuyon na ini agud mangin kumportable man ang mga vendors sa ila pwesto.

Nahibaluan nga una ginrenovate ang sa riverside area kag pagkatapos diri, suguran ang sa sulod sang TATC.

Ginapadasig sang alkalde ang trabaho agud maplastar sa maayo nga pwesto ang mga negosyante.

Pag-abot naman sa mga vendors nga wala pa nakapabakuna, suno kay Mendoza nga nasumiter na sini ang papel nga iya ginpafill-up sa mga negosyante sa TATC kag ginahulat na lamang nga pagatawgon sila para sa pagbakuna.

Ginpahayag ni Mendoza nga nakita sini nga problema ang gamay nga alokasyon sang vaccine rason nga indi tanan ang mabakunahan.

Apang sa karon nagdamo na ang vaccine nga nag-alabutan gani posible nga sa masunod nga mga inadlaw, ipatawag na ang mga vendors para mabakunahan.

Suno diri nga handum ni Mayor Dadivas nga tanan nga residente sang syudad ang mabakunahan agud maangkon ang herd immunity.

Nagpangabay man si Mendoza sa mga vendors nga wala nagasuksok sang facemask apang nagalibot sa TATC nga sundon ang ginapatuman nga mga health protocols kag indi magpaugtas bangud padayon sila nga naga-monitor kun sin-o ang salawayon sa pagtuman sa pagsulundan.