Mabakas sa iya trabaho bilang municipal administrator kag sinsero nga nagaserbisyo sa mga Pilareño ang ginluthang-patay nga si Mr. John Heredia.

Ini ang paglaragway sang alkalde sang Pilar kay Heredia.

-- Advertising --

Suno kay Mayor Arnold Perez nga masami nila gina-estoryahan ni Heredia sang buhi pa ini ang mga programa kag ang dapat himoon para mabuligan ang mga Pilareño kag magprogreso ang banwa.

Ginpahayag sa opisyal nga nakita man sini sa ila nga pag-updanay ang sinseridad ni Heredia sa pagpanerbisyo.

Indi man makahatag sang pat-ud nga komento ang alkalde kun ayhan naapektuhan sa implementasyon sa pila ka mga programa sa ila banwa ang yara sa likod sang krimen.

Apang isa sa mga complainant si Heredia sa ginpasaka nga kaso batuk sa anay alkalde sang Pilar sa Office of the Ombudsman.

Ginpanindugan man ni Mayor Perez nga wala nila na-estoryahan kag wala sang plano nga magpadalagan sa pulitika si Heredia bangud ang luyag lamang sini nga magprogreso ang Pilar kag mabuligan ang mga Pilareño.

Samtang wala man sila naka-estorya sang maayo ni Atty. Cris Heredia, ang tiayon ni John Heredia bangud sang Domingo sang gab-I sang nagpadulong ini sa punerarya, nakita sini nga kinahanglan sang pahuway sang abogada bangud sa gulpiada nga insidente nga wala ginalauman sang tanan.

Ang ila lamang na-estoryahan sa malip-ot nga oras amo ang hamyang kag pag-otopsiya sa bangkay ni John kag kun diin ini ihamyang.

Paga-estoryahan man sang konseho kalakip ang mga stakeholders ang paghatag sang reward money sa sin-o makatudlo sa yara sa likod sang krimen.