ROXAS CITY – Wala pa sang fixed date kung san-o ang lubong ni Prince Philip, ang Duke of Edinburgh matapos nagtaliwan sa edad nga 99 sa Windsor Castle sa United Kingdom.

Suno kay Bombo International Correspondent Roland Crispo, tumandok sang banwa sang Ivisan, probinsiya sang Capiz kag nagatrabaho kag naga-estar sa Oxford, London, anxious kag desperado sa karon ang mga tawo, nga luyag  maghatag sang tribute sa pagkamatay sang asawa ni Queen Elizabeth II, apang hugot nga ginadumilian ang mass gathering bilang kabahin sang ginapatuman nga health protocol sa pungsod.

-- Advertising --

Pag-abot sa lubong ni Prince Philip, wala pa nagpaguha sang impormasyon ang Bukingham Palace kun magapatigayon sang state funeral ukon sundon ang katapusan nga hinyo sang nagtaliwan nga prinsipe.

Apang sa pre-plan ukon may codename Operation Forth Bridge sa state funeral magapatigayon sang programa kag magasuksok sang black armband ang tanan nga mga empleyado sang gobyerno kalakip na ang mga miyembro sang parliamento kag MPs bilang pagpakita sang respeto kag pagkilala sa nangin  remarkable service sang panahon nga yara ini sa royal navy.

Samtang ginalauman sang mga Briton ang pag-abot ni Prince Harry para magpakig-upod sa kalisod sang ila pamilya sa pagkamatay sang iya lolo, apang bangud akig ang kadam-an kay Meghan Markle, indi welcome ang pagbalik sini sa London.

Nahibaluan nga makapila ka beses nga nagaguha pasulod sa ospital si Prince Philip humalin pa sang bulan sang Disyembre, sa diin sang Marso 16, 2021 sang  i-discharge ini sa ospital kag nagpabilin na lamang sa Windsor castle kaupod si Queen Elizabeth II tobtob napatay bangud sa kumplikasyon sa iya sakit.