Napasakaan sang panumbungon nga direct assault in person of authority sang mga kapulisan ang 26-anyos nga mauy nga lalaki nga nagwaras kag nagpangsipa sa mga nagresponde nga pulis sa Barangay Agsur sa nasambit nga banwa.

Ginpahayag ni Police Lt. Nanette Puasan, hepe sang Sapian PNP nga nagapabilin karon sa karsel si alyas Dondon nga nagpanakit sa mga pulis nga tuyo lamang magpacify sa ginahimo nga pagpangbangga sa mga motorista.

Nahibaluan nga nagapatigayon sang checkpoint ang mga kapulisan sa banwa sang Sapian, may nag-imporma sa ila nga nagapang-bangga sa mga motorista sa Barangay Agsur ang suspek nga yara sa impluwensiya sang makahulubog nga ilimnon.

Suno sa opisyal nga may ginsumbag nga motorista si Dondon sa diin sang ginsablaw ini sang tanod iya man ini ginsumbag.

Magluwas diri may pila man ka mga kababainhan ang nagpalab-ot sang reklamo nga kalakip sila sa nakatilaw sa sumbag ni Dondon.

-- Advertisement --

Pagkakita sang suspek sa patrol sang mga pulis, ginaalegar nga ginhuba sini ang t-shirt kag kasubong naghanda para sa pagpakig-away sa kapulisan.

Matawhay ini nga gin-estorya sang mga pulis apang nagpamalibad nga magsakay sa patrol car.

Ginaalegar nga nagwaras si alyas Dondon kag nagpangsipa ang mga pulis nga naigo sa nawong samtang nag-angkon sang bagras sa kamot si Lt. Puasan.