ROXAS CITY – Ginkumpirma sang abugado sang isa ka upline/investor sang 25 Days Double your Money Investment Scheme nga wala sila nakabaton sang text message nga naga-imporma nga kalakip sila sa pagabalikan sang partial payment sa ila investment subong nga adlaw.

Sa exclusive interview sang Bombo Radyo kay Atty. Leo Superio, abugado ni Katrina Aguirre, ba-se sa mga impormasyon nga ginpalab-ot sa ila sang nakabaton sang mga text info subong nga adlaw ang paghatag sang partial payment ni Junelyn Gregorio sa mga investors.

-- Advertising --

Apang gin-athag ni Superio nga wala sang kun anuman nga komunikasyon nga ginpalab-ot sa iya kliyente ang kampo ni Gregorio.

Kasubong man nga wala na ginasapak ni Gregorio si Aguirre matapos nabuyagyag ang ireguridad sang nasambit nga investment scheme.

Pananglitan nga wala sang matabo nga partial payment sa mga investors subong nga adlaw, ginpasiguro ni Atty. Superio nga magapasaka na sila sang kaso nga syndicated estafa batuk kay Gregorio sa masunod nga semana.

Katuyuan man sang ila tikang agud indi ma-pressure si Gregorio kag mapakita sa

ila mga downlines nga seryoso sila nga bawion ang ila investments nga ginremit ni Aguirre kay Gregorio.

May ginauyatan man nga ebedensiya ang kampo ni Aguirre nga magapamatood nga na-remit na sini ang mga investments sang iya mga downlines kay Gregorio nga amo ang utok sang 25 Days Double your Money Investment Scheme.

Ginapanindugan pa sang abugado, nga biktima lamang ang iya kliyente nga isa ka man ka investor kag upline.

Nahibaluan nga ang katapusan nga investment nga ginremit ni Aguirre kay Gregorio sang nagligad nga Enero 10-11, 2021 ang nagalab-ot sa P65 milyones nga cash.