Nangin mainit ang ginpatigayon nga committee hearing sang Committee on Environment sang Sangguniang Panlalawigan matapos nakaangkon sang pagtaasay sang tingog ang chairman sang Committee on Environment, Commiittee on Education kag head sang CAPENRO, bangud sa opinyon kag panindugan sang kada isa angut sa kontrobersyal nga pagpauntat sa illegal quarry operation sang Local Government Unit (LGU) sang Sigma.

Sa pagsugod pa lamang sang hearing, ginkwestyon na ni Board Member Thea Faith Reyes ang CAPENRO kun ayhan na-reach out sini ang mga local chief executives nga may nagakahinabo nga quarry operations sa ila lugar.

-- Advertising --

Dugang pa ni Reyes nga indi bala dapat nga sa 1st offense nga makomiter, warning lamang ini kag indi dapat pagdakpon.

Ginpahayag pa sang board member nga sa bahin sang Sigma kag Panitan, klaro nga nagakuha sila sa ila man mismo resources sa ila lugar kag wala nila ini ginabaligya para maka-ginansiy.

Kun tan-awon nga ginahimo sang mga alkalde ang ila trabaho para mahatagan sang kaayuhan kag makabenepisyo ang mga pumuluyo.

Ginsabat naman ni Atty. Emilyn Depon, head sang CAPENRO ang mga ginakwestyon ni BM Reyes.

Suno kay Depon nga ba-se sa ordinansa wala sang warning sa 1st offense bangud may nakomiter na nga paglapas ang LGU.

Ginpahayag sini nga may environmental impact ang quarrying kag apektado ang tanan.

Ginapanindugan sini ang kampanya sang CAPENRO nga istriktuhon ang pagpatuman sang pagsulundan kag wala sang exemption sa diin ang sin-u man nga maglapas ang magapangatubang sang penalidad

Apang mataas ang tingog nga nagsabat si Board Member Mateo Hachuela nga indi patas ang pagpangdakup sang task force bangud selective sila ukon may pinilian.
Partikular nga gintumod ni Hachuela ang illegal quarry operation nga nagakahinabo sa Barangay Dacuton, Dumarao nga wala ginadakup sang task force.

Nagdepensa naman si Atty. Depon sa nangin akusasyon ni Hachuela nga may pinilian ang task force.

Posible suno kay Depon nga assumption lamang sang nasambit nga board member ang iya alegasyon.

Ginapanindugan sini nga wala sang nagreport ukon nagpalab-ot sang impormasyon angut sa illegal quarry operation nga nagakahinabo sa banwa sang Dumarao.

Aminado si Depon nga indi masarangan libuton sang task force ang 17 ka mga LGU.

Apang ginklaro nga indi buot silingon nga ila lamang ginapili ang dakpon.