SAPIAN, CAPIZ -Personal nga nagdangup sa Bombo Radyo Roxas ang pamilya sang Capizeña OFW nga nagatrabaho sa Saudi Arabia nga nag-alegar ginamaltrato kag ginasakit sang iya employer.

Ginpahayag ni Mr. Manuel Villas Ofher, utod ni Anabel Villas Ofher sang Sitio Bangkal, Barangay Maninang, Sapian, Capiz, gintuad sa ila sang manghod nga gina-sprayhan ang iya nawong kag dughan kag ginaplantsa ang kamot sang sadista nga employer, kun indi mahimo ang iya ginapaubra.

-- Advertising --

Suno sa tagreklamo nga sa sulod sang duha ka tuig nga pagtrabaho sa Saudi Arabia sang ginang, indi na maisip ang pagsakit nga iya nabaton gikan sa iya nga amo.

Bangud indi na maagwantahan sang biktima ang pagpanakit sa iya, nagpangayo na ini sang bulig sa pamilya sa probinsiya sang Capiz nga nagapakig-angut man sa nagakaigo nga ehensiya sang gobyerno.

Samtang suno naman sa dalagita nga anak sang biktima nga nabalaka ini sa kabuhi sang iloy.

Ginpahayag ni Aira nga sang Domingo sang gab-I nagchat pa sila kag nakita sini ang kawris ukon samad sa kamot sang iloy nga palatandaan nga ginsakit kag ginamaltrato ini sang employer sa Saudi Arabia.