Nakahunong na sa karsel sang Pontevedra Municipal Police Station ang apat sa lima ka mga suspek nga nagluthang patay sa ila man lamang pakaisa sa Barangay Sublangon, Pontevedra, Capiz.

Kalakip sa mga nadakpan nga nagluthang-patay kay Franklin Billones sa hot pursuit operation sang kapulisan sanday Jerry Boy Fuentes utod sang una nga nagsungka nga si Japher Fuentes, mag-utod nga Jofil kag Jonel Billones sang Barangay Bahit, Panitan.

-- Advertising --

Nagapabilin lamang nga at-large ang trigger man nga si Presty Blancaflor nga madasig nagpalagyo matapos makomiter ang krimen.

Ginpahayag ni Emiline Billones asawa sang manghod sang biktima nga nagsinggitan ang mga suspek nga pakaisa man sang iya bana kag ginapaguha ini.

Apang sang nabatian sang biktima, nagpadulong ini sa balay sang manghod sa diin pagpalapit sang biktima, gilayon siya nga ginluthang ni Blancaflor gamit ang 12 gauge shotgun sa diin naigo ini sa nawala nga bahin sang dughan.

Gindala pa sa ospital ang biktima, apang gindeklara nga dead on arrival sang doktor.

Nagaguha nga motibo sa krimen ang pagpauntat sang manghod sang biktima kag pagkuha sang net nga ginagamit sang mga suspek sa paghampang sang volleyball sa diin ginkaakig ini sang mga suspek.

Samtag nagpanawagan ang pamilya sang biktima kay Blancaflor nga magsungka na lamang.

Apang pananglitan nga magpakatig-a, maobligar sila pasaka sang kaso nga murder.