ROXAS CITY – Ginreklamo sang 11-anyos nga dalagita ang tiyo nga naghimulos sa iya  sa balay sang iya nga lola sa isa ka barangay sa Roxas City sang nagligad nga bulan sang Mayo.

Sa interview sang Bombo Radyo Roxas kay alyas Nene, ginpahayag sini nga apat ka beses ini nga ginhimuslan sang tiyo nga si Roger 38-anyos may asawa kag anak kag isa ka tricycle driver.

Natabo ang paghimulos sa biktima samtang nagapahuway ini sa 2nd floor sang balay, sa diin ginkatingala sini sang hinali nga nagsunod sa iya ang suspek kasunod ang pagtabon sa iya bibig kag paghimulos sa iya.

Wala gilayon nakasugid ang biktima matapos nga paandaman sang suspek kag ginhatagan sang P20.00.

Suno kay Nene nga wala sini ginalauman nga himuslan siya sang tiyo, bangud kasubong na  sa isa ka amay ang iya pagkabig diri, matapos nga napatay ang amay sang biktima nga utod sang suspek.

-- Advertisement --

Bangud sa pagguba sang suspek sa iya maayo nga buwas damlag, gusto makita sang dalagita ang tiyo sa sulod sang karsel.

Nahibaluan nga ginbilin sang ila iloy ang biktima kag utod sini sa poder sang iya ugangan matapos nga nagtrabaho ini sa Metro Manila.