Inihayag ng Department of Labor and Employment (DOLE) sa pagdinig ng House Legislative Energy Action Development (LEAD) Committee na pinalawak na ang P1.2-bilyong TUPAD Tuloy Pasada program upang isama hindi lamang ang mga tsuper ng jeepney kundi pati na rin ang mga paddler, operator ng motorized bangka, at tricycle drivers na apektado ng pagtaas ng presyo ng langis.
Sa pagdinig nitong Miyerkules na pinangunahan ni Marikina Rep. Miro Quimbo, sinabi ni DOLE Undersecretary Ernesto Bitonio na inihanda na ng ahensya ang pag-amyenda ng programa bago pa man ideklara ang state of energy emergency.
Ayon kay Bitonio, kahit bago inilabas ang Executive Order No. 110 noong Marso 24, 2026, nagsimula na ang DOLE na i-realign ang mga programa nito kasunod ng pagsiklab ng tensyon sa Middle East noong Pebrero 28.
Naglaan ang DOLE ng paunang P1.2 bilyon mula sa Integrated Livelihood and Emergency Employment Program upang tugunan ang epekto ng krisis sa sektor ng paggawa.
Ipinaliwanag ni Bitonio na unang tinutukan ang sektor ng transportasyon dahil mahalaga ito upang manatiling gumagalaw ang ekonomiya.
Sinabi rin niya na sinimulan na noong Lunes ang pilot implementation ng TUPAD Tuloy Pasada para sa mga public utility vehicle drivers na nawalan o lumiit ang kita dahil sa oil shock.
Isinasagawa ang programa sa pakikipagtulungan sa Land Transportation Franchising and Regulatory Board (LTFRB), na siyang nagbibigay ng listahan ng mga operator at transport cooperatives na daraan sa validation ng DOLE.
Sa ilalim ng programa, bibigyan ang mga kwalipikadong tsuper ng sahod na katumbas ng minimum wage kapalit ng anim na oras na biyahe kada araw, alinsunod sa labor at safety standards.
Nilinaw ni Bitonio na ang listahan mula sa LTFRB ay panimulang batayan lamang at dadaan pa rin sa pagsusuri ng DOLE, ngunit hindi nito isinasara ang pinto sa iba pang tsuper na maaaring makinabang sa ibang anyo ng tulong.
Dagdag pa niya, pinalawak na ang saklaw ng programa sa iba pang transport workers tulad ng mga paddler at operator ng motorized bangka sa rehiyon ng CARAGA, gayundin sa mga tricycle driver sa Quezon City na tumigil sa pamamasada dahil sa mataas na gastos sa gasolina.
Ayon sa DOLE, maaari ring makinabang ang mga ito sa regular na TUPAD program kahit wala sa listahan ng LTFRB.
