Pinangunahan ni Tyrese Maxey ang Philadelphia 76ers sa 106-102 panalo laban sa Utah Jazz matapos magtala ng 25 points, habang nag-ambag naman si Quentin Grimes ng dalawang free throw sa last quarter ng game.
Nakapag-ambag din si Jabari Walker ng 22 points at 10 rebounds para sa Sixers, na naglaro nang wala sina Joel Embiid (oblique injury), Kelly Oubre Jr. (illness), VJ Edgecombe (back injury) at Paul George (suspension).
Bagama’t 8 sa 22 lamang ang naipasok ni Maxey mula sa field, nakakuha siya ng suporta mula sa kanyang mga kakampi, kabilang ang 16 points ni Grimes, upang maiwasan ng Philadelphia ang ikatlong sunod na pagkatalo.
Sa panig ng Utah, pinangunahan naman ni Keyonte George ang koponan sa kanyang 30 points. Nagdagdag si Isaiah Collier ng 18 points, habang sina Ace Bailey at Blake Hinson ay nag-ambag ng 12 at 11 points.
Mahigpit ang laban sa fourth quarter hanggang mabulsa ni George ang magkasunod na three-point shot na nagbigay ng 100-94 na kalamangan sa Jazz may 4:51 pang natitira. Gayunman, nakabawi ang Sixers sa mahigit 4 minutong natitirang oras at naitabla ang laban matapos ang putback slam ni Adem Bona.
Tabla ang iskor sa 102 nang ma-foul si Grimes sa isang drive na may 16.4 segundo lang sa laro. Naipasok niya ang dalawang free throws upang maibigay ang lamang sa Philadelphia. Matapos pumalya ang three-point attempt ni Kyle Filipowski, nagdagdag pa si Walker ng dalawang free throw upang tuluyang maselyuhan ang panalo.
