Binigyang diin ng Department of Foreign Affairs (DFA) na ang mahigit 400 Filipino na nagtatrabaho sa Yangon ay nasa maayos na kalagayan sa gitna ng pagbaba ng alert level sa Myanmar.
Kung matatandaan, inaprubahan ng DFA na i-downgrade mula alert level 4 hanggang 2 ang alert level sa Myanmar kasunod ng pagbisita ni DFA Undersecretary Eduardo Jose de Vega.
Ani de Vega, kontrolado na ang sitwasyon sa Myanmar at wala nang dapat ikabahala.
Nilinaw ng opisyal na hindi pa babalik sa normal ang sitwasyon sa Myanmar at mananatili ang walang bagong deployment policy ng Pilipinas.
Ngunit aniya, kasalukuyang tinitingnan ng Department of Migrant Workers ang posibilidad na payagan ang mga dating repatriated OFW na bumalik sa trabaho sa Myanmar.
Sa kanyang pagbisita sa Myanmar, sinabi ni De Vega na tiniyak ng mga awtoridad ng pulisya na titingnan at sisiguruhin ang seguridad ng mga Pinoy na nasa naturang bansa.
