LEGAZPI CITY- Kinumpirmar kan National Police Commission (NAPOLCOM) na narelieve na sa pwesto an viral na hepe kan Bato Municipal Police Station na si Capt. Ariel Buraga.

Nagtrending si Buraga makalihis an pahayag kaini na garong nagbabasol pa sa kawaran nin respeto ninda Sonya asin Frank Anthony Gregorio kung kaya binadil gadan ni Police Senior Master Sergeant Jonel Nuesca sa Tarlac City.

Sa eksklusibong intrevista kan Bombo Radyo Legazpi kay Atty. Edman Pares an Assistant Regional Director kan NAPOLCOM Bicol, may mga netizens na nagshare asin nagreport sa saindang opisina kan screen shots kan viral na komento kan opisyal kung kaya tulos na sinugo an Catanduanes Police Provincial office na halion muna sa pwesto si Buraga.

-- Advertisement --

Pinagpapaliwanag na sa ngunyan an hepe kung nata siring kaini an naging komento sa isyu asin pig-aadalan kung may pagbayolar sa ethical standard of a government employee lalo pang saro ining halangkaw na opisyal kan pulis.

Tinawang duon ni Pares, na gabos man na tawo maging mga pulis an may derecho na magpahayag kan saindang komento sa mga isyu alagad dapat na maging balanse asin responsable lalo pang naapektaran man an emahe kan kapulisan.

Paramientras na riribayan si Buraga ni PLt. Fidel Romero Jr. bilang officer in charge kan Bato MPS.

Magigirumduman na enot naman na nagsurat si Bato Mayor Johnny Rodolfo sa opisina kan Catanduanes Police Provincial office na naghahagad na mahali sa saindang banwaan asin mailipat nin estasyon an nasabing hepe.