LEGAZPI CITY- Pangapudan man giraray kan lokal na gobyerno kan Virac an dugang na suplay nin bakuna kontra sa COVID 19 kasunod kan marikas na naglalangkaw na kaso kan virus sa rehiyon.

Kasuodma kan mag-abot sa 645 an kabilugang bagong kaso nin COVID 19 na nairehistro sa Bicol sa laog sana nin sarong aldaw.

Sa intrevista kan Bombo Radyo Legazpi kay Mayor Posoy Sarmiento, aminado an opisyal na atrasado na an pagtatao nin bakuna sa banwaan huli sa kakaposan nin suplay nin COVID 19 vaccines hali sa Department of Health (DOH).

Hasta sa ngunyan kaya dae pa maabot sa 20% kan mga residentes an natatawanan nin bakuna mantang nagpupuon pa sana nin pananao sa mga nasa A4 category.

Segun kay Sarmiento, nasasabutan niya an problema sa kakulangan nin suplay lalo pang mas prayoridad an mga lugar na may mas dakol na kaso kan nakakaolakit na helang siring kan mga ciudad nin Legazpi asin Naga.

-- Advertisement --

Pangapudan na sana kan alkalde sa mga residentes lalo na ngunyan na kulang pa sa bakuna na magsunod na sana sa mga pigpapaotob na health protocols asin mas pangatamanan an salud nganing na dae tamaan kan nakakaolakit na helang.