LEGAZPI CITY- Nagsakat na sa siyam na mga banwaan sa Catanduanes an nakapagrehistro nin kaso kan helang sa mga orig na African Swine Fever kung kaya duwang banwaan na sana an solamenteng salbado sa virus.

Sa intrevista kan Bombo Radyo Legazpi kay Dr. Jane Rubio an Provincial Veterinarian kan Catanduanes, kaiba sa mga lugar na may kaso na nin ASF an Baras, Bato, Caramoran, Gigmoto, Panganiban, San Andres, San Miguel, Viga asin Virac.

An mga banwaan na sana nin Pandan asin Bagamanoc an wara pa nin kaso nin ASF alagad pigkakahandalang makapagrehistro man kan helang en kasong magluwas na an resulta nin panibagong samples na kinua hali sa nasabing mga lugar.

-- Advertisement --

Segun kay Rubio, marikas an naging paglakop kan ASF sa provincia kung kaya puga-puga man an saindang culling operation kung sain lampas sa 1,000 na mga orig na an ginadan na laog sa 500 meter radius hali sa mga ground zero o mga lugar na pinagpunan kan outbreak.

Huli digdi nahahandal na opisyal na kulangon na nin suplay nin karneng orig an provincia lalo pang maging sa mga lugar na wara pa nin AASF, pigbubuno na an mga orig sa pagkahandal na maolakitan pa kan helang.

Nangapudan na sana si Rubio sa publiko na dae na muna magbakal asin magbiyahe nin anuman na produktong hali sa karneng orig ngani na mapugolan an paglakop pa kan ASF.