-- ADVERTISEMENT --

LEGAZPI CITY- Gadan an sarong pulis na suspek sa iligal na pagpapabakal nin mga badil makalihis na mauli sa engkwentro an ikinasar na entrapment operation kan mga otoridad sa Barangay Matagangtang, Placer, Masbate.

Binisto an suspek na si Police Staff Sergeant Grafilo Pahilino na nakadestino sa Cataingan MPS, Masbate Police Provincial Office.

Segun sa Placer PNP, enot na nakaresibe nin impormasyon an saindang hepatura manungod sa suboot pagpapabakal kan suspek nin mga badil asin pagiging protektor nin Bustillos Drug group na nag-ooperar sa lugar.

Haloy man na binantayan kan PNP an hiro ni Pahilino hasta sa napatugot ini kan police puseur buyer na makipaghilingan sa lugar para sa transaksyon, kung kaya ikinasar an buy bust operation.

Matrayumpong nakabakal an operatiba nin tolong caliber 38 revolver asin sarong caliber 45 norinco sa suspek sa kantidad na P25,000.
Alagad kan aarestaron na ini kan mga pulis, digdi na nagbulnot nin badil an suspek asin pinaputokan an pulis pusuer buyer kung kaya nagbalos man nin putok an mga otoridad.

-- ADVERTISEMENT --

Tinamaan nin bala an suspek na binalo pa man kutang idalagan sa ospital alagad ideneklarar ng dead on arrival mantang nalugadan man sa braso an pulis pusuer buyer.

Nakua pa kan mga otoridad sa hawak kan suspek an sarong government issued 9mm pistol asin duwang extra magasin.

Sa ngunyan pinag-iimbestigaran kan PNP kung sisay pa an posibleng kasabwat kan suspek sa pagpapabakal kan iligal na badil asin kung sisay man an mga naging customer kaini.