LEGAZPI CITY- Naglunsar na nin pursuit operation asin nagkaag nin mga checkpoints an Philippine Army asin Philippine National Police nganing madakop an mga miyembro kan rebeldeng New People’s Army na suspek sa pang-aambush sa mga suldado sa Barangay Banquerohan, Legazpi City, Albay.

Gadan sa tama nin bala an tolong biktima na binistong sinda Cpl Joemar Mancilla Maravilla, PFC Ronald Luna Zamora asin PFC Reymar Badong Palencia mantang lugadan man an saro pa nindang pag-iriba na si Sgt Ferdinand Fernandez Ignas.

Sa intrevista kan Bombo Radyo Legazpi kay Capt. John Paul Belleza an Division Public Affairs Office (DPAO) Chief kan 9th Infantry Division Philippine Army, inapod kaining teroristic attack an ginibo kan nasa 10 mga rebelde na nagpauran nin bala sa mga biktima gamit an halangkaw na kalibre nin badil.

-- Advertisement --

Napag-araman na papasiring kuta sa Taysan Police station an mga biktima lunad kan saindang mga motorsiklo ngani na maghagad nin tabang sa kapulisan sa pagtataong seguridad sa lugar kan mangyari an insidente.

Aminado an opisyal na may mga presensya talaga kan mga rebelde sa nasabing parte kan barangay kung kaya pinadara an mga suldado na mataong asistensya sa isasagibong road opening kan Barangay Villahermosa pasiring sa Barangay Bariis.

Mahigot man na kinondenar kan opisyal an ginibo kan mga rebelde na suboot mawot sanang manakot asin daeng habas na nanggadan kan mga daeng kalaban-laban na suldado.

Sa ibong kaini, nangangapudan man giraray an Philippine Army sa mga miyembro kan NPA na magsurindir na asin magbalik loob sa gobyerno huli ta tatabangan man an mga ini na makapag-bagong buhay.