LEGAZPI CITY- Mahigot na nakabantay an Philippine Coast Guard sa MV Tug Clyde na lunad an 19 crew na nagsasairarom sa quarantine sa kadagatan kan Barangay Lidong, Sto. Domingo, Albay kasabay kan naeeksperyensyahan na raot nin panahon.

Sa intrevista kan Bombo Radyo legazpi kay PCG Bicol Deputy Commander Capt. Wilmo Maquirang, makusog an mga pag-uran asin paros sa ngunyan sa provincia dara kan Habagat kung kaya nakatutok man an saindang mga personahes sa kamugtakan kan mga crew lalo na sa 11 nagpositibo sa COVID 19.

Aru-aldaw na pighihiling kan PCG an mga lunad kan barko sa harayong distansya asin pighahapot sa saindang kamugtakan apwera pa sa nagpapatrolya sa palibot kaini.

-- Advertisement --

Gabos man suboot na crew an nasa maray na kondisyon mantang anas na asymptomatic an mga nagposiribo sa COVID 19 na wara nin naeeksperyensyahang sintomas.

Ngunyan na semana pinaglalaoman na maabot an mga doktor na pigkontrata kan kompanyang may kagsadiri kan tug boat ngani na isairarom sa swab test na 19 crew asin maaraman an saindang kondisyon.

Mahigot man an patanid kan opisyal sa mga residentes asin gabos na sakayang pandagat na ibitaran an pagrani sa nasabing tug boat nganing maibitaran an paglakop pa kan COVID 19.