-- ADVERTISEMENT --

LEGAZPI CITY- Gadan an limang miyembro kan rebeldeng New People’s Army makalihis na mauli sa engkwentro an pagseserbi nin arrest warrant kan mga otoridad kontra sa rebelde sa Barangay Bugtong, Mandaon, Masbate.

Segun sa Mandaon Municipal Police Station, nagserbi nin warrant of arrest an mga pulis kontra kay Eddie/Arnold Rosero alyas Ka Star asin mga pag-iriba kaini na wanted sa limang kaso nin murder, attempted murder, pagbayolar sa international humanitarian law, genocide asin pagbayolar sa derechos humano.

Alagad kan paparani na an mga otoridad sa harong kan suspek, digdi na nagkaigwa nin ribayan nin putok an mga pulis asin rebelde na naghaloy nin nasa 30 minutos.

Gadan an limang dae pa nabibistong miyembro kan mga rebelde mantang wara nin nakulogan sa lado kan mga pulis.

Makalihis an insidente marikas na nagdulag paparayo an iba pang rebelde na pinaghahanap naman kan mga sotoridad sa inilunsar na hot pursuit operation.

-- ADVERTISEMENT --

Mientras tanto, narekober man sa pinangyarihan kan insidente an tolong M16 rifle, sarong M14 rifle; duwang kalibre 45; improvised explosive device na may detonating cap, bandolier asin iba pa.