LEGAZPI CITY- Ipighayag ni Albay 1st District Rep. Edcel Lagman na posibleng nagpapahamot sana nin pangaran sa Estadus Unidos si Presidente Rodrigo Duterte katakod kan paparaning eleksyon kan bawion kaini an desisyon nin kanselasyon kan Visiting Forces Agreement (VFA) kan duwang nasyun.

Sa eksklusibong intrevista kan Bombo Radyo Legazpi kay Lagman, paparani na naman kaya an national elections sa masunod na taon kung kaya nagpapabida na an Presidente asin naghahanap na nin magiging kaalyado nganing makakua nin suporta.

Lalo pa suboot na plano naman ni Duterte na magdalagan bilang Bise Presidente sa 2022 elections kung sain matunog na ka-tandem kaini an aki na si Davao City Mayor Sarah Duterte-Carpio.

-- Advertisement --

Nanindugan si Lagman na sa puon pa sana sala na an rason kan presidente para sa pagbusol kan abrogation kan VFA huli sana sa pagkanselar kan US sa VISA kan mahigot kaining kaamigo na si Senador Ronald “Bato” Dela Rosa.

Tinuyaw man kaini an pabago-bagong desisyon ni Duterte manungod sa isyu na dae suboot nakakatabang sa relasyon kan Pilipinas sa ibang nasyun.

Suhestiyon ni Lagman kay Duterte na idagos na sana an napunan asin kanselaron na an VFA lalo pang kung hihilingon mas nakikinabang suboot an US sa agreement kesa sa Pilipinas.

Magigirumduman na Enero kan nakalihis na taon kan kumpirmaron ni Senador Bato na nakanselar kan US an saiyang VISA bagay na ikinadagit ni Duterte.