LEGAZPI CITY- Kinontra kan sarong kongresista an pigpapaotob sa ngunyan na “no vaccine, no entry policy” sa provincia nin Masbate katakod kan padagos na huma kan coronavirus disease pandemic.

Photo by: Ga Managase J-r Olshoppe (facebook)

Sa intrevista kan Bombo Radyo Legazpi kay Masbate 1st District Rep. Narciso Bravo Jr., nakipagkoordinar na siya kay Bicol IATF Chairman asin DILG Director Anthony Nuyda nganing madiskutir an isyu na inapod kaining discriminatory para sa mga dae pa nakakapabakuna.

Sa irarom kaya kan polisiya bawal na maglaog sa provincia an mga bako pa fully vaccinated asin dapat 15 aldaw na an nakakalihis kan makapagpabakuna antes na magbiyahe, bagay na dipisil man suboot para sa mga authorized persons outside of residence (APOR) na nagtatrabaho sa luwas kan provincia.

-- Advertisement --

Pigtaong ehemplo ni Bravo an nangyari sa Lapu-Lapu City na nagpaotob man kan kaparehong polisiya alagad mismong si Interior Secretary Eduardo Año an nagkontra asin nagpapundo kaini.

Tinuyaw pa ni Cong. Bravo an biglaan na pagpapaotob kan polisiya kung sain makalihis na inanunsyo tulos ining ipinaotob kinaagahan rason nganing mag-abot sa labi sa 260 persona an mastranded sa Pio Duran port na mabiyahe pasiring sa island province.

Ngunyan na aldaw nakatalaan na mag-ulay an Bicol asin local IATF manungod sa isyu, mantang desidido an nagrereklamong kongresista na irani an problema kay Sec. Año en kasong dae pa ini maresolberan.