LEGAZPI CITY- Nahahampang sa patung-patong na kaso an sarong CAFGU member makalihis na magwala sa laog nin kampo nin militar asin manulo nin anom na motorsiklo asin sarong ayam sa Barangay San Isidro, Sta. Magdalena, Sorsogon.

Binisto an suspek na si Albert Gajo 35 anyos na miyembro kan CAFGU Active Auxiliaries (CAA) asin residente kan nasabing lugar.

Sa intrevista kan Bombo Radyo Legazpi kay Lt. Edwin Dela Fuente hepe kan Santa Magdalena Municipal Police Station, nakaresibe nin report an saindang hepatura manungod sa piggigibong pagwawala kan suspek sa kampo kan militar.

-- Advertisement --

Pag-abot kan mga pulis, naaktohan an suspek mantang nagsusuriyaw asin nahiling man na nasusulo na an anom na motorsiklo na pagsadiri kan pag-iriba kaini sa CAFGU asin sarong Belgian dog.

Binalong papundohon kan mga pulis si Gajo alagad nanlaban pa ini asin binalong saksakon nin ice pick an sarong pulis na maswerteng nakalikay asin nagsapar sana nin garos.

Marikas man na napugolan an suspek na tulos na dinara sa hepatura kan pulis para sa magkakanigong disposisyon.

Nagluwas sa imbestigasyon kan PNP na personal na dagit an motibo kan suspek huli ta pighuna kaining napahali na siya sa trabaho alagad pigpapahingalo man sana palan nin duwang bulan kan saindang lider dara kan namamatian na helang.

Nahahampang an suspek sa kasong arson asin direct assault huli sa pangungulog sa nagrespondeng pulis.