-- ADVERTISEMENT --

LEGAZPI CITY— Pigbabasol ngunyan kan nagkapirang residentes urog na sa probinsya kan Masbate an mga rebeldeng New People’s Army (NPA) huli sa padagos na pagbungkaras kan mga kariribukan kun sain an mga sibilyan an labing naaapektaran.

Katakod kaini, nangapudan nin pagsabot asin naghagad nin dispensa si 9th Infantry Division Public Affairs Office Chief Capt. Randy Llunar sa mga naaapektaran kan padagos na labanan kan pwersa kan gobyerno asin kan mga rebelde.

Segun sa opisyal, klaro na pigbabalgar kan mga NPA an diretsos kan mga sibilyan urog pa na dae nin pakiaram an mga ini kun igwa nin madamay sa saindang mga kagigibuhan.

Mientrastanto, sienerto man ni Llunar na pigigibo ninda an saindang trabaho ngani na padagos na makapagtao nin proteksyon sa publiko kasabay kan paghali sa pagkahandal kan mga ini.