LEGAZPI CITY- Kumpiyansa an sarong political analyst na magiging magayon an labanan ngunyang 2022 presidential elections huli ta anas man na may kapabilidad an mga kandidato.

Sa intrevista kan Bombo Radyo Legazpi kay Professor Clarita Carlos sarong Political Science Professor sa University of the Philippines, kung hihilingon anas namay halawig ng eksperyensya sa politika an mga aspiring presidential candidates asin may kapabilidad ng magserbi bilang pinakahalangkaw na opisyal kan nasyun.

Kaiba sa mga kumpirmado ng madalang bilang presidente sa masunod na taon sinda Manila Mayor Isko Moreno, dating Senador Bongbong Marcos, Senador Panfilo Lacson asin Senador Manny Pacquiao mantang pighahalat pa an magiging anunsyo ninda Bise Presidente Leni Robredo asin Davao City Mayor Sarah Duterte.

Segun kay Prof. Carlos, posibleng magkakatalo na sana pag-abot sa gayon kan platapormang ibubusol sa panahon kan kampanya asin sa kusog kan kanya-kanyang makinarya.

Tinawang man kaini na dae pwedesir na minoson maski na sisay man sa mga presidential candidates huli ta wara nin pinal sa politika asin pwedesir na magbago an pulso kan mga botante maski na sa mismong aldaw nin pirilian.

-- Advertisement --

Abiso man kan political analyst na abangan an mga magiging katandem kan presidential cadidates lalo pang hasta sa ngunyan sinda Senate President Vicente Sotto III, Presidente Rodrigo Duterte asin Dr. Willie Ong pa sana an kumpirmadong madalagan para sa nasabing posisyon.