LEGAZPI CITY- Nagpasar na nin resolusyon an Makabayan Bloc para sa imbestigasyon sa pagkakagadan kan mga pulis sa duwang aktibista sa Guinobatan, Albay.

Hulyo 26 kan magadan kan mga pulis sinda Jemar Palero, 22 anyos, asin Marlon Naperi, 38 anyos makalihis na maaktohan na nagpipintura sa Banao Bridge asin suboot nanlaban.

Sa intrevista kan Bombo Radyo Legazpi kay Albay 1st District Rep. Edcel Lagman, nakaabot na sa saindang atensyon an makahandal na nangyari sa duwang aktibista na dapat na matawanang atensyon ngani na dae na mautro pa.

-- Advertisement --

Segun kay Lagman kwestiyonable an pahayag kan mga pulis na nanlaban an duwa lalo pang bako man na lehitimong operasyon siring kan buy bust o search warrant an nangyari asin naaktohan man sana an duwa na naggigibo nin graffiti na kontra kay Presidente Rodrigo Duterte.

Mismong mga pag-iriba naman ni Palero asin Naperi an nagtaram na bako man na armado an mga biktima mantang buhay pa kan arestaron asin ilunad sa mobile kan mga pulis.

Nanindugan pa an Kongresista na tututokan an insidente ngani na dae naman nin mga aktibista na nagkokontra sa administrasyon an malaag sa kaparehong sitwasyon.

Naenot naman na naglunsar an Commission on Human Rights nin imbestigasyon sa insidente, mantang nagkokolektar naman nin mga ebidensya asin impormasyon an NBI, PNP-IAS asin CIDG ngani na matawanan nin linaw an totoong nangyari.