LEGAZPI CITY- Pigkukwestiyon sa ngunyan an pigsasabing maanomalyang transaksyon kan goyerno provincial kan Alabay sa pagbakal nin P36.4 milyon na kantidad nin daga sa Barangay Bubulusan, Guinobatan na gagamiton bilang resettlement area.

Sa intrevista kan Bombo Radyo Legazpi kay Board Member Rolly Rosal, pigbuyagyag kaining Nobyembre 10, 2020 kan hagadon ni Albay Governor Al Francis Bichara an pagpasar nin sarong resolusyon para sa pagbakal kan nasabing lote na nasa 145,854 square meters an dakula asin pagsadiri ni Josefina Garcia-Ze.

Alagad kwestiyonable suboot kung nata marikas na naipasar an resolusyon na wara man lamang na ginibong survey nganing mapag-adalan man kuta kung salbadong gibohong resettlement area an lugar.

-- Advertisement --

Huli digdi nakipag-ulay an konsehal sa mismong may kagsadiri kan daga, kung sain nadiskobreng Marso 2018 pa palan naipabakal an lote sa presyo sanang P5.4 milyon.

Pigkukwestiyon ngunyan ni Rosal kung nata naggastos an gobyerno provincial nin P36.4 milyon sa daga na dati ng naipabakal sa hibabang presyo.

Sa ngunyan isinangat na kan konsehal an reklamo sa NBI nganing maisairarom sa imbestigasyon mantang plano pang magsangat nin reklamo sa Ombudsman.