LEGAZPI CITY- Lugadan an limang katawo makalihis na pagbabadilon kan mga pinagtutubudang miyembro kan NPA, mantang gadan an saro sa mga suspek sa nangyaring insidente sa Barangay Tubod, Placer, Masbate.

Segun sa Masbate Police Provincial office, naglalakaw sana an biktimang si Valiente Mangubat, kapitan kan Barangay Villa Innocencio kaiba an mga kabarangay kan biglang magbot an grupo nin NPA.

Tulos na pinauranan nin bala kan mga suspek an mga biktima rason nganing magsapar nin lugad sa hawak si Mangubat asin apat sa mga pag-iriba kaini na sinda Ramil Argawanon, Tedecio Enero; Rei Dietro, asin sarong menor de edad na lalaki.

Marikas man na nakabalos nin putok nin badil an Kapitan hasta sa tamaan nin bala asin magadan an saro sa mga suspek.

Makalihis ini, nagdulag na paparayo an mga grupo kan armadong kalalakihan asin binayaan na an pag-iribang binawian nin buhay.

-- Advertisement --

Sa ngunyan nasa salbado ng kondisyon an mga nalugadan sa insidente mantang pigbibisto pa kan PNP an pigtutubudang NPA na nagadan sa engkwentro.

Pinag-aaraman pa kan kung ano an posibleng motibo asin sisay an target sa ginibong pag-atake sa mga biktima.