-- ADVERTISEMENT --

LEGAZPI CITY — Pinababa na ngunyan an pwersa kan 83rd Infantry Batallion makalihis na masiertong nakarayo na an mga rebeldeng New Peoples Army (NPA) sa banwaan kan Guinobatan, Albay.

Enot kaini, nairehistro an magkasunod na engkwentro sa pagultanan kan pwersa kan gobyerno asin 15 miyembro kan rebeldeng grupo sa Barangay Bololo sa nasabing banwaan kun saen nangyari an enot na engkwentro dakong alas 4:00 nin hapon na nagdurar nin haros 10 minuto.

Makalihis ini, nakabakbakan liwat kan mga militar an parehong grupo kan NPA dakong alas 5:00 na nin hapon.

Sa intrevista kan Bombo Radyo Legazpi kay Brigadier General Claudio Yucot, commanding officer kan 901st Infantry Brigade, nakabantay an pwersa sa lugar makalihis manotaran na pinagkukutaan an lugar kan mga rebelde.

Kinumpirma man kan opisyal na wara suboot na nairehistrong nalugadan sa hanay kan duwang lado.

-- ADVERTISEMENT --

Narekober sa pinangyarihan kan insidente an mga improvised explosive device (IED), detonating wires, battery asin personal na gamit kan mga ini.

Pinawi man ni Yucot an pagkahandal kan mga residente sa lugar katakod kan nangyaring engkwentro kasabay kan pagirumdom na kaipuhan man liwat na maging maingat asin marikmat sa anumang presensya kan NPA.

Kun babalikan, enot ng nagkaigwa nin engkwentro sa Barangay Bololo kan Marso 12 kun saen haros sinabayan ini kan saro pang bakbakan kan duwang lado na nairehistro sa banwaan kan Lagonoy, Camarines Sur.