LEGAZPI CITY- Pinahimutikan kan Department of Education (DOH) an mga salang pagtubod kan nagkakapirang Filipino sa pigsasabing negatibong epekto kan bakuna kontra sa coronavirus disease.

Sa intrevista kan Bombo Radyo Legazpi kay Dr. Rita Ang-Bon an COVID 19 vaccination program Coordinator kan DOH Bicol, bako totoo an mga pagtubod na nakakalaglag sa bados, nakakabaog o nakakasadit kan ari kan lalaki an bakuna.

Nagsairarom suboot sa halawig na mga pag-aadal an mga bakuna antes na itao sa publiko kung sain naprobaran na wara ining malalang epekto apwera na sana sa dikit na side effects siring kan kalintura, paggatol sa parte kan hawak na nabakunahan, kulog nin payo asin iba pa.

-- Advertisement --

Abiso man kaini sa publiko na dae basta-bastang magtubod sa mga nagluluwas na impormasyon manungod sa bakuna lalo na kung wara nin magkakanigong basehan.

Mientras tanto, sa ngunyan padagos pa an pagtatao nin bakuna kan DOH Bicol sa mga nasa A1, A2 asin A3 category kung sain ngunyan aldaw nakatalaan na mag-abot an nasa 28,000 na doses kan Sinovac vaccine sa rehiyon.