-- ADVERTISEMENT --


LEGAZPI CITY- Kumpiyansa an Department of Budget and Management na maipapasar ngunyan na taon an 2022 proposed national budget na pigsasairarom na sa deliberasyon kan Kongreso.

Sa ibong ini kan tensyon sa pagultangan ni Presidente Rodrigo Duterte asin kan Senado huli sa nagpapadagos man na pagdangog kan Senate Blue Ribbon Committee sa pigsasabing maanomaliyang pagbakal nin mga pandemic supplies hali sa Pharmally, bagay na pigkokontra kan administrasyon.

Sa eksklusibong intrevista kan Bombo Radyo Legazpi kay DBM Bicol Director Renato De Vera, malabo na dae maipasa asin magkaigwa sana nin re-enacted budget an nasyun lalo na ta eleksyon na sa masunod na taon asin nahahampang sa COVID 19 pandemic an nasyun.

Kung dae kaya maipapasar an budget siertong maapektaran an emahe kan mga Senador sa mga botanteng Pilipino asin makaka-impluwensya man ini sa magiging resulta kan eleksyon.

Alagad aminado an opisyal na nagkapira sa mga proposed budget kan ahensya kan gobyerno an buminaba huli sa bagsak man na koleksyon kan gobyerno mantang itinagama an kadaklan sa pondo para sa pagsimbag sa COVID 19 pandemic.

-- ADVERTISEMENT --

Pinaglalaoman naman an pagkakaigwa nin borrowings hali sa mga local asin foreign sources nganing mapondo an mga pangenot na programa kan nasyun.

Magigirumduman na enot ng naghuma si Presidente Duterte na dae niya pipirmahan an 2022 proposed budget kung idadagos kan Senado an planong halian nin pondo an Office of the Presidente.

ulos man ngani ining pinahimutikan ni Senate President Vicente Sotto III na nanindugang posibleng salang impormasyon sana an naresibe kan presidente huli ta wara suboot ini sa plano kan Senado.